သင်္ကန်းကျွန်းမြို့နယ် ၁၆ ရပ်ကွက်တွင် မီးလောင်မှု ဖြစ်ပွားခဲ့ရာ အိမ်ြေ...
ရန်ကုန်တိုင်းဒေသကြီး၊ သင်္ကန်းကျွန်းမြို့နယ်၊ ၁၆ ရပ်ကွက် အပိုင်း ၄ ရှိ သီတာရေစင်လမ်းတွင် ဖေဖော်ဝါရီလ ၈ ရက်နေ့ နေ့လည် ၂ နာရီအချိန်ခန့်က မီးလောင်မှုတစ်ခုဖြစ်ပွားခဲ့ကြောင်း သတင်းရရှိသည်။
အဆိုပါမီးလောင်မှုမှာ မီးဖိုအသုံးပြုရာမှတစ်ဆင့် စတင်ခဲ့ခြင်း ဖြစ်သည်ဟု သိရပြီး မီးလောင်မှု အိမ်ခြေ ၁၀ လုံးကျော် မီးလောင်ခဲ့ရကြောင်း သိရှိရသည်။
"နေ့လည် ၂ နာရီလောက်မှာ ညှော်နံ့တွေထွက်လာလို့ အိမ်အပြင် ထွက်ကြည့်လိုက်တော့ မီးခိုးထွက် နေတာတွေ့လိုက်ရတယ်။ နောက် ၁၀ မိနစ်လောက်ကြာတော့ မီးညွန့်တွေ ထွက်လာတာတွေ့ရတယ်။ စဖြစ်တဲ့ အိမ်ကနေ တောက်လျှောက် လောင်လာတာ အိမ်ခြေ ၁၀ လုံးကျော် လောက်ပါသွားပြီး သက်ဆိုင်ရာက မီးငြှိမ်းနိုင်ခဲ့တယ်"ဟု မီးလောင်မှုအား ကိုယ်တိုင်ကြုံတွေ့ခဲ့ရသူတစ်ဦး က ပြောပြခဲ့သည်။
"ကျွန်မတို့က ဒီကိုပြောင်းလာတာ တစ်ပတ်လောက်ပဲရှိသေးတယ်။ အခုမီးလောင်ခံခဲ့ရတဲ့ အိမ်မှာ ကျွန်မအမေတစ်ယောက်တည်း နေတာပါ။ ကျွန်မတို့က အခြားနေရာမှာနေပါတယ်။ မီးလောင်တယ်ဆိုလို့ ချက်ချင်းပြေးလာပြီး ကျွန်မအမေကိုတော့ စိတ်ချရတဲ့နေရာမှာ ထားပြီးပါပြီ။ ကျွန်မတို့အိမ်ထဲက ဘာပစ္စည်းမှပြန်မရလိုက်ဘူး။ ပိုက်ဆံတွေရော၊ ပစ္စည်းတွေပါ အကုန်ပါသွားတယ်"ဟု အိမ်မီးလောင်ခံခဲ့သူ အမျိုးသမီးတစ်ဦးက ပြောပြခဲ့သည်။
မီးလောင်ရာတွင် အိမ်ခြေဆုံးရှုံးခဲ့သည့်သူများအတွက် ကယ်ဆယ်ရေးစခန်းများကို သက်ဆိုင်ရာ ရပ်ကွက်ဓမ္မာရုံများတွင် ဖွင့်လှစ်ပေးထားခဲ့ကြောင်း သိရှိရသည်။
No comments:
Post a Comment